Nagsumpa na bilang bag-o nga president sang Paraguay si Pedro Alliana, matapos ginpaidalum sa house arrest si anay president Santiago Peña may kaangtanan ini sa krisis sa digital bank sang pungsod.
Suno sa mga prosecutor, ginahibalo pa nila kun ano ang kaso nga ipasaka batuk kay Peña, apang mahimo nga maglakip ini sang paggamit sang impluwensya agud makakuha sang pabor ukon influence peddling.
Matandaan nga ginkakas sa pwesto si Peña isa ka oras matapos ang unanimous vote sang mga senador pabor sa impeachment. Ginkwestyon sang mga mamalidha ang ginapahayag kahilabtanan sang anay presidente sa krisis sang digital bank nga Ueno nga nagahatag sang serbisyo sa halos katunga sang populasyon sang Paraguay.
Apisar nga nagtanyag si Peña nga mag-resign sang Huwebes, ginpili sang Senado nga padayunon ang proseso sang impeachment sa baylo nga batunon ang iya resignation. Bangod sini, gilayon nga nagsumpa si Alliana sa iya lugar.
Matapos nga nadakpan si Peña, nagtipon ang mga raliyista sa guwa sang iya puluy-an kag gilayon man nga gin-assign ang kapulisan para sa dugang nga seguridad sa lugar agud mapabilin ang katawhay.
