Nakabatyag sang paghina sang pagbaligyaanay ang pila ka fish vendor sa Teodoro Arcenas Trade Center bangud sa naganubo nga demand sang mga nagapang bakal sang isda, nga posible nga may kaangtanan man sa nagataas nga presyo sang mga nagapanginahanglanon sa adlaw-adlaw.
Sa interview sang Bombo Radyo kay Hernando Bayonita, isa ka fish vendor, iya ginpahayag nga mabatyagan nila ang pagnubo sang kadamuon sang ila mga customer bangud may mga konsumidor nga nagatipid na lamang kag ginakonsiderar ang ila limitado nga budget antes magbakal sang isda.
Suno kay Bayonita, isa man sa mga ginakabig nga nagadugang sa kabudlayan sang ila pangabuhian amo ang pagsaka sang presyo sang gatong nga ginagamit sa pagpangita kag pagdala sang mga isda, rason nga nagadugang sa ila puhunan kag operasyon.
Suno sa iya, budlay kun kaisa nga mabalik ang ila kapital bangud indi garantiya nga mahurot ang ila mga baligya sa sulod sang isa ka adlaw, gani may posibilidad nga magamay ang ila kita ukon mapierde pa sila.
Bangud sini, nagalaum ang mga fish vendor nga mag-ayo liwat ang sitwasyon sang pagbaligyaanay kag magpabilin nga masarangan sang publiko ang presyo sang isda agud indi lamang ang mga nagabaligya kundi pati man ang mga konsumidor ang indi mabudlayan.
