ROXAS CITY-Gintutukan Ang mga isyu parte sa West Philippine Sea, good governance, accountability, rule of law kag aktibo nga pagpakigbahin sang kabataan sa mga isyu sang pungsod amo ang mga nagapanguna nga gintalakay sa GenZennial Tour sang Team Pinas sa Capiz State University (CapSU) Main Campus sa Roxas City.
Sa interview sang BOMBO RADYO kay Atty. Dino De Leon, Core Member and Legal Counsel sang Team Pinas kag Law Partner sang De Leon Arevalo Gonzales Law Firm, ginpahayag sini nga kabahin sa ila kampanya ang paghatag sang husto nga impormasyon sa mga Gen Z kag Millennials agud mas mahangpan nila kon ngaa dapat sila may kaangtanan kag magpakabana sa mga nagakatabo sa West Philippine Sea.
Suno kay De Leon, may yara sila sang bug-os nga learning module nga nagatalakay sa territorial dispute, lakip na kon ngaa importante nga protektahan ang soberanya sang Pilipinas, kon dapat bala mahadlok ang mga Pilipino sa posibilidad sang giyera kag kon paano dapat atubangon ang agresibo nga mga tikang sang China, lakip ang paggamit sang water cannon batok sa mga barko sang Pilipinas. Ginpabug-atan man sini nga ang Pilipinas nagapabilin nga nagagamit sang pagpugong kag pagpailob, samtang ginakabig nga importante nga sandigan ang 2016 arbitral ruling nga nagdesisyon pabor sa Pilipinas.
Sa bahin sang governance accountability, ginpahayag ni De Leon nga gintutukan man sang Team Pinas ang mga isyu sang korapsyon, confidential funds kag impeachment, lakip ang posibilidad nga maimpluwensiyahan sang China ang isa sa pinakamataas nga opisyal sang pungsod. Gindugang man sini ang importansya sang pagrespeto sa due process kag rule of law, lakip sa nagapadayon nga proseso batok kay anay Presidente Rodrigo Duterte sa International Criminal Court (ICC).
Ginpahayag man ni De Leon nga ang Mutual Defense Treaty sang Pilipinas kag Estados Unidos nagapabilin nga importante nga bahin sang bilateral relations sang duha ka pungsod, kag suno sa iya, ginapasiguro sang US nga indi mabag-o ang ila commitment bisan magbaylo ang administrasyon sa tunga sang Democrats kag Republicans. Apang, importante man suno sa iya nga bantayan ang mga tikang sang administrasyon ni US President Donald Trump, lakip ang epekto sang mga polisiya sini sa ICC kag sa international relations.
Samtang, gin-engganyo ni De Leon ang mga pamatan-on nga indi magpadala sa pagkabahin-bahin bangud sa ila tagsa ka politikal nga pagkampi, pareho sang pagpanig kay Duterte, Marcos ukon sa iban pa nga personalidad. Ginpabug-atan sini nga dapat ang pagkamaunungon sang mga Pilipino yara sa pungsod kag indi sa isa lamang ka politiko, ilabi na sa mga importante nga isyu sang teritoryo, accountability kag pagpatuman sang layi.
Kabahin sa GenZennial Tour ang mga interactive activities, discussions kag learning booths nga nagatinguha nga himuon nga mas personal, masabtan kag mapuslanon ang mga civic conversations para sa kabataan. Ginhiwat ang aktibidad sang Nobyembre 6, 2026, sa Dadivas Gym sang Capiz State University Main Campus, nga may temang “The GenZennial Tour: We Decide the Future.”
