CAPIZ-Ginhatagan pagtamud sang 12th Sangguniang Panlalawigan sang Capiz sang otoridad si Governor Fredenil H. Castro nga magsulod kag magpirma sang Memorandum of Agreement (MOA) upod sa Early Childhood Care and Development (ECCD) Council para sa pagpauswag kag pagpatuman sang mga programa kag serbisyo para sa mga kabataan sa probinsya, ini gin proposed gid mismo sang committee on laws and governance and social services (Women, Children and Families, and PWDs) and Disaster Risk Reduction Management).
Paagi sa amo nga kasugtanan, ginapaabot nga mapabakod ang kooperasyon sa tunga sang ECCD Council kag Provincial Government sang Capiz sa pagsiguro sang de-kalidad nga pag-atipan, edukasyon, nutrisyon kag kabug-osan nga pag-develop sang mga kabataan, ilabi na sa ila temprano nga mga tuig.
Lakip sa mga ginatutukan sang programa ang pagpatindog ukon pagpaayo sang mga Child Development Centers (CDC), paghatag sang nagakaigo nga learning materials kag educational equipment, kag pagpauswag sang kapasidad sang mga Child Development Workers paagi sa training kag technical assistance.
Sa idalom sang MOA, ang ECCD Council maga-extend sang teknikal kag iban pa nga suporta, samtang ang Provincial Government sang Capiz ang magabulig sa pagpatuman kag pagdumala sang mga programa kag pasilidad, lakip ang pagsiguro sang nagakaigo nga lugar kag pagmintinar sang mga serbisyo.
Ang amo nga inisyatibo nagasunod sa Republic Act No. 12199 ukon Early Childhood Care and Development System Act nga nagapabakod sang sistema sang pag-atipan kag edukasyon para sa mga kabataan sa pungsod.
