CAPIZ-Ginpasa kag gin-aprobaran sang Committee on Laws and Good Governance sang Sangguniang Panlalawigan (SP) sang Capiz, sa pagpamuno ni 2nd District Board Member Gilbert Ardivilla, ang tatlo ka proposed resolution nga nagatuyo nga mapabaskog ang pagdumala kag mapalapad ang serbisyo publiko sa probinsya.
Lakip sa mga tikang nga gin-aprobaran sang komitiba amo ang paghatag sang otoridad kay Governor Fredenil “Oto” H. Castro nga magpirma sang Memorandum of Understanding (MOU) upod sa Philippine National Volunteer Service Coordinating Agency (PNVSCA) para sa pag-deploy sang US Peace Corps Volunteers nga magabulig sa implementasyon sang Coastal-and-Ecosystem-Based Fisheries Management Program sang probinsya.
Paagi sa amo nga inisyatibo, ginapaabot nga makabulig ang mga boluntaryo sa pagpauswag sang pagdumala kag pagprotektar sang mga kadagatan kag coastal ecosystems sang Capiz, lakip na ang paghatag sang teknikal nga bulig sa mga komunidad kag sa mga programa para sa malungtarong pagdumala sang pangisdaan.
Gin-aprobaran man sang komitiba ang proposed resolution nga nagahatag sang pagtugot sa Provincial Government of Capiz nga magsulod sa Memorandum of Agreement (MOA) upod sa Municipal Government of Sapian agud mapalapit sa mga pumuluyo ang nagkalain-lain nga serbisyo-medikal halin sa Mambusao District Hospital.
Kalakip sa mga serbisyong igahatag sa banwa sang Sapian ang ambulance services, OB-GYN, pediatrician kag X-ray services. Paagi sini, ginatuyo nga mapauswag ang access sang mga pumuluyo, ilabi na sang mga nagakinahanglan sang espesyalista nga pag-atipan, sa mga serbisyo panglawas nga wala na kinahanglan magbiyahe sa malayo nga lugar.
Samtang, gin-aprobaran man ang proposed resolution para sa pagtukod sang Provincial Technical Working Group (TWG) on Road Safety nga magatutok sa pagpalig-on sang kaluwasan sa mga kalsada, pag-amlig sang mga imprastraktura sa dalan kag pagpatuman sang nagakaigo nga regulasyon sa pag-agi sang mga heavy vehicles sa nagkalain-lain nga bahin sang probinsya.
Lakip sa ginapaabot nga katungdanan sang TWG ang pagtuon kag pagrekomendar sang mga tikang agud mapunggan ang wala nagakaigo nga paggamit sang mga kalsada, malikawan ang mga aksidente kag maminusan ang pagkaguba sang mga dalan bangud sa mabug-at nga mga salakyan.
Suno sa ginpresentar nga mga tikang, ang tatlo ka proposed resolution nagatuyo nga mapalapad ang kooperasyon sang probinsyal kag lokal nga panguluhan, mapauswag ang serbisyo panglawas kag mapabaskog ang pagdumala sa mga natural resources kag imprastraktura sang Capiz.
Matapos ang pag-aprobar sang komitiba, ang tatlo ka proposed resolution igasaylo sa plenaryo sang Sangguniang Panlalawigan para sa dugang nga pagtalakay kag pormal nga aksyon sang bug-os nga konseho.
