Arestado ang isa ka lalaki sa pagluthang gamit ang air gun sa hot pursuit operation sang mga kapulisan sa Barangay Caidquid, Mambusao, Capiz.
Ang suspek amo si alyas Joe, yara sa legal nga pang edaron, samtang ang biktima amo si alyas Toto, lunsay residente sang nasambit nga lugar.
Sa interview sang Bombo Radyo kay Police Major Ruby C Magallanes, Officer in Charge sang Mambusao Municipal Police Station, iya ginpahayag nga nagapanginhangin lamang ang biktima sa iya ugsaran sang hinali ini nga ginpalapitan kag gintiro sang suspek, kag gilayon nga nakapalagyo.
Suno kay Magallanes, nag-angkon sang pilas sa iya lawas ang biktima kag gilayon naman ini nga gindala sa ospital.
Dugang pa sini, may daan na nga hiligut-anon ang magtimbang nga bahin.
Sa karon, yara na sa kustodiya sang Mambusao Municipal Police Station, ang suspek kag magapangatubang sang kaso nga frustrated murder.
