Nagapati ang isa ka constitutional law expert nga posible may nagapugong ukon naga-pressure sa mga testigo nga indi pagbuyagyag ang ila nahibaluan may kaangtanan sa alegasyon sang wala mapaathag nga manggad ni Bise Presidente Sara Duterte.
Sa interview sang Bombo Radyo kay Atty. Ephraim Cortez, President, National Union of Peoples Lawyers, iya ginpahayag kun ngaa may mga testigo nga ginpresentar sa impeachment proceedings nga daw wala sang bastante nga ihibalo ukon indi makahatag sang importante nga impormasyon tuhoy sa mga isyu nga gina-atubang sang bise presidente.
Suno kay Cortez, nagakadapat man nga pamangkuton kun ngaa ang mga indibidwal nga wala sang direkta nga ihibalo sa mga bagay nga gina-imbestigaran ang ginalakip sa listahan sang mga testigo, samtang ang ila testimonya ang ginalauman nga makabulig sa pag-athag sang mga alegasyon.
Dugang pa niya, makatilingala man kun nga-a may mga witness nga posible may importante nga impormasyon nga ipaambit apang wala nagabuyagyag sang ila nahibaluan. Bangud sini, wala niya ginadula ang posibilidad nga may mga tawo nga naga-impluwensya ukon nagapugong sa mga testigo nga maghambal.
Ginhatagan pagtamod sang natungdan ang importansya sang presensya sang mga testigo nga may personal nga ihibalo sa mga bagay nga gina-imbestigaran agud makabulig sa pag-athag sang mga alegasyon may kaangtanan sa gina-alegar wala mapaathag nga manggad ni Duterte.
