DAO, CAPIZ – Ginapanawagan sang Kapulisan sa tanan nga mga estudyante nga i-report ang bullying kag kaduda-duda nga aktibidad sa palibot sang ila eskwelahan agud mabuligan nga mapabilin nga malinong kag luwas ang learning environment.
Sa interview sang Bombo Radyo kay Police Major Rey C Dordas, Officer-in-Charge sang Dao Municipal Police Station, iya ginpahayag nga importante nga indi pagbalewalaon sang mga estudyante ang mga insidente sang bullying kag gilayon ini nga ipahibalo sa mga responsable nga persona sa eskwelahan agud maaksyunan kag masolusyunan sa temprano nga tion.
Suno kay Dordas, dapat man nga mangin alerto ang mga kabataan sa ila palibot kag ireport sa ila mga maestro, maestra, guard ukon security personnel ang presensya sang mga tawo ukon aktibidad nga nagapaduda sa ila.
Pahayag pa niya, importante gid ang pagtudlo sang disiplina, pagrespeto kag pagsunod sa mga pagsulundan sa mga kabataan, ilabi na sa elementarya. Dapat nila respetuhon ang ila mga kaupdanan nga estudyante, ginikanan, manunudlo kag iban pa nga awtoridad.
Sa karon ginapanawagan sa tanan, ang disiplina sa kaugalingon makabulig man sa mga kabataan nga maabot ang ila mga handum sa kabuhi, samtgang gindayaw man niya ang mga estudyante nga nagapakita sang kooperasyon kag may mga handum nga makaalagad sa publiko sa palaabuton.
