CAPIZ-Pormal na ginbendisyunan kag ginbuksan ang YAKAP/GAMOT One-Stop Shop sa Sen. Gerardo M. Roxas Memorial District Hospital (SGMRMDH) sa Barangay Balucuan, banwa sang Dao, subong nga adlaw, Nobyembre 12, 2026, nga ginsaksihan ni Capiz Governor Fredenil H. Castro.
Ang YAKAP ukon Yaman ng Kalusugan Program kag GAMOT ukon Guaranteed and Accessible Medications for Outpatient Treatment One-Stop Shop isa ka programa sang PhilHealth nga nagatuyo nga mapahapos ang pag-access sang mga miyembro kag ila dependents sa nagkalain-lain nga serbisyong panglawas.
Paagi sa sini nga pasilidad, mahimo na nga makarehistro, makapa-konsulta, makakuha sang libre nga laboratory tests kag bulong para sa outpatient care ang mga kwalipikado nga PhilHealth members kag ila dependents sa isa lamang ka rehistrado nga pasilidad.
May yara man ini sang benepisyo nga nagalab-ot tubtob P20,000 kada tuig para sa mga kinahanglanon nga serbisyo-medikal kag bulong, suno sa ginpatuman nga mga benepisyo sang programa.
Sa iya mensahe, ginpanginbulahan ni Governor Castro ang pagdumala ni SGMRMDH Chief of Hospital Dr. Mark Anthony Basquez, bangud sa nagkalain-lain nga inisyatibo kag pagkilala nga nabaton sang ospital para sa pagpauswag sang serbisyo sa mga pasyente kag komunidad.
Gindayaw man sang gobernador ang mga empleyado sang ospital nga nangin kabahin sa pagpatuman sang mga programa kag pagkab-ot sang mga kadalag-an sang institusyon.
Nagtambong man sa pagbendisyon kag pagbukas sang pasilidad ang mga representante sang PhilHealth, sanday Board Members Erwin Andrada kag Nico Yap, Provincial Administrator Atty. Arthur John H. Biñas, 2nd District Deputy Provincial Administrator Rosemarie Gardose, Provincial Information Officer Atty. Luvim D. Amores, Provincial Health Officer Dr. Alex Nolasco, kag Tapaz District Hospital Acting Chief of Hospital Dr. Ma. Suzzette Jinon.
Paagi sa pagbukas sang YAKAP/GAMOT One-Stop Shop, ginapalapad ang access sang mga pumuluyo sa serbisyo-medikal, laboratory tests kag bulong, ilabi na para sa mga outpatient nga nagakinahanglan sang mas mahapos kag mas hapos ma-access nga serbisyong panglawas.
