Ginsurrender sang Bureau of Fisheries and Aquatic Resources (BFAR)-Capiz ang mga illegal nga explosives nga ginagamit sa pagpangisda sa baybayon sang Pilar, Capiz bangud mahimo ini maghatag sang peligro sa kabuhi sang tawo kag maghalit sa kadagatan.
Sa interview sang Bombo Radyo kay Police Executive Master Sergeant Daniel Repedro Tunod, Team Leader sang Capiz Provincial Explosive Ordnance Disposal and Canine Unit (CAPIZ PECU), iya ginpahayag nga ila gina-secure ang mga explosives nga ginaturn-over sa ila sang mga local government unit (LGU) kag kapulisan.
Suno kay Tunod, nagaresponde man ang ila unit sa mga report parte sa bomb threat agud masiguro ang seguridad sang publiko.
Samtang, ginpahanumdom naman ni Police Senior Master Sergeant Felipe S Dellava Jr., EOD Technician, ang publiko nga likawan ang paggamit sang explosives sa pagpangisda bangud mahimo ini magresulta sa malala nga pilas kag permanente nga halit sa lawas.
Suno kay Dellava Jr., may mga mangingisda na nga nakaeksperyensya sang aksidente sa amo nga pamaagi sang pagpangisda kag nagresulta sa pagkautod sang pila nila ka tudlo.
Bangud sini, ginapanawagan sang mga otoridad ang publiko, ilabi na ang mga mangingisda, nga untaton ang paggamit sang illegal nga explosives kag sundon ang nagakaigo nga pamaagi sang pagpangisda agud malikawan ang disgrasya kag maprotektahan ang kadagatan.
