-- ADVERTISEMENT --

Nagpasundayag sang ila mga adbokasiya ang una nga batch nga Mutya sang Roxas 2026 nga hiwaton sa Dinggoy Roxas Civic Center sa November 29, 2026.

Sa interview sang Bombo Radyo kay Lenith Andrea Lou Amata sang Barangay Jumaguicjic, iya ginpahayag nga ang tagsa-tagsa may yara sang kinaiya nga kaanyag kag ini ang mas nagaguwa kun may yara sang mayo nga tagipusuon.

Suno kay Lenith, ang pagiging isa ka beauty queen ang wala nasukat sa sash ukon sa korona nga nasuksok kundi sa maayo nga advocacy para makabulig sa komunidad.

Ginakabig naman ni Princess Joyce Icamina sang Barangay Culajao nga isa ka bugal ang mga delicacies sang syudad sang Roxas kag probinsya sang Capiz kag bilang isa ka Tourism student kun mahatagan sang kahigayunan, iya himuon nga platform ang iya pagka beauty queen agud mapalapad ini.

Suno naman kay Francine Kate Latigay sang Barangay Loctugan, ang edukasyon ang isa ka pinakaimportante nga bagay nga dapat hatagan sang pagtamod sang mga kabataan agud malab-ot sini ang ila mga handum sa kabuhi kag paagi man sa platform makahatag ini sang inspirasyon sa kaangay niya.

-- ADVERTISEMENT --

Luyag naman na ipakigbahin ni Jessa Mae Bernas sang Barangay Lanot ang iya sini nga ihibalo pag-abot sa financial literacy sa mga kabataan agud matudluan sila nga magkinot kag mangin responsible sa paggasto sang kwarta.

Ginpahayag naman ni Jerianne Mae Bajada sang Barangay Dayao nga luyag sini nga mangin isa ka manunudlo agud makahatag inspirasyon sa mga kabataan nga hatagan sang importansya ang edukasyon para sa ila maayo nga palaabuton.

Ang mga Persons Deprived of Liberty (PDls) naman ang sentro sang adbokasiya ni Mary Pretty May Maximo sang Barangay Cagay bangud luyag sini mahibaluan ang ila estorya sa likod sang mga rehas.

Samtang todo naman ang preparasyon ni Abygail Maigue sang Barangay San Jose bilang una ini nga major pageant nga iya nga paga-intrahan kag iya siguruhon nga himuon sini ang tanan agud makuha ang Korona.