-- ADVERTISEMENT --

Pormal na nga nagpirma ang Pilipinas kag Australia sang isa ka kasugtanan nga nagatuyo sa pagpabaskog sang defence ties kag military cooperation sa tunga sang duha ka pungsod. B

Ang Defence Cooperation Agreement (DCA) ang ginpirmahan nanday Defense Secretary Gilberto Teodoro Jr kag Australian Ambassador to the Philippines Marc Innes-Brown kahapon nga adlaw.

Suno kay Teodoro, katuyuan sang nasambit nga kasugtanan nga mapadasig kag mapahapos ang koordinasyon sang duha ka pungsod sa mga bagay may kaangtanan sa militar kag seguridad.

Nagalakip ini sang pagsabat sa mga kalamidad, pagbakal sang mga kagamitan militar, kag pagpatigayon sang tingub nga military training sa duta kag kadagatan.

Ginhatagan pagtamod ni Teodoro nga isa sa mayor nga benepisyo sang kasugtanan amo ang mas madasig nga pagresponde sang Australia sa tion sang kalamidad bangud mabuhinan ang kinahanglanon nga mga permit kag proseso.

-- ADVERTISEMENT --

Suno sa iya, sa baylo nga mag-agi sa madamo nga separado nga mga pagtugot, may yara sang mas ginpasimple nga proseso agud gilayon nga makahatag sang bulig ang mga kaalyado sang Australia.

Gin-athag ni Teodoro nga lain ang kasugtanan sa Enhanced Defence Cooperation Agreement ukon EDCA sa tunga sang Pilipinas kag Estados Unidos nga nagapahanugot sa paggamit sang mga tropa sang Estados Unidos sa mga designated military facilities sa pungsod.

Samtang, ang Pilipinas, USA, Japan kag Australia natalana man nga magtukod sang isa ka Combined Coordination Center sa Manila agud labi pa nga mapabaskog ang kooperasyon sa pagpaambit sang impormasyon, domain awareness kag interoperability sang ila mga militar.