-- ADVERTISEMENT --

Nagapahanumdom ang isa ka legal expert sa publiko nga mangin responsable sa paggamit sang cellphone, camera kag social media agud malikawan ang paglapas sa privacy kag dignidad sang iban.


Sa interview sang Bombo Radyo kay Atty. Nichelle Hope A. Fara-on sang Integrated Bar of the Philippines- Capiz Chspter, iya ginpahayag ang importansya sang pag-angkom sang ihibalo angut sa Republic Act No. 9995 ukon Anti-Photo and Video Voyeurism Act of 2009.


Suno kay Fara-on, ginadumilian sang amo nga layi ang wala pahanugot nga pagkuha sang litrato ukon video sang tawo nga nagahimo sang pribado nga sexual act, ukon ang pagkuha sang laragway sa sitwasyon nga may reasonable expectation of privacy.

Gin-athag man sini nga indi lamang ang tawo nga orihinal nga nagrekord sang intimate video ukon litrato ang mahimo mapanabat sa idalom sang sini nga layi, kundi lakip man ang mga nagakopya, nagapanagtag, nagapakita ukon nagapublicize sini nga wala sang kinahanglan nga pagtugot.

Samtang, ginpaathag man sini nga ang mga mapamatud-an nga nakalapas sa RA 9995 mahimo mapreso sang tatlo tubtob pito ka tuig kag multa nga nagabalor sang P100,000 tubtob P500,000.

-- ADVERTISEMENT --