-- ADVERTISEMENT --

Nalakip ang Barangay Banica sa Roxas City sa lima ka barangay nga ginatutukan sang Philippine Drug Enforcement Agency (PDEA) bangod sa problema may kaangtanan sa ilegal nga droga.

Sa interview sang Bombo Radyo kay Punong Barangay Mike Xander Agrasada, iya ginpahayag nga suportado niya ang paglakip sang ila barangay sa watch list sang PDEA bilang isa ka tikang agod mapabakod pa ang kampanya kontra ilegal nga droga sa ila komunidad.

Suno kay Agrasada, nagbisita na ang mga opisyal sang PDEA, kaupod ang City Health Office, agod talakayon ang mga programa kag interbensyon nga mahimo mahatag sa mga kabataan kag sa mga indibidwal nga mahimo mag-surrender sa palaabuton.

Pahayag pa niya, padayon ang 24/7 monitoring sang barangay, lakip ang pag-update sang listahan sang mga persona nga ginatutukan kag ang pag-coordinate sa nagakaigo nga mga awtoridad.

Dugang pa niya, may yara sila sang padayon nga koordinasyon sa PDEA kag Philippine National Police (PNP), ilabi na sa pagmonitor sang mga ginakabig nga drug hotspots kag pagreport sang mga aktibidad nga may kaangtanan sa ilegal nga droga.

-- ADVERTISEMENT --

Ginpahayag man ni Agrasada nga isa sa mga kabudlayan nga ila ginatubang sa kampanya amo ang limitado nga kapasidad sang peace and order team kag mga barangay tanod sa pagpatuman sang mga aksyon batok sa mga persona nga naangot sa ilegal nga droga.

Bangod sini, nagapadayon ang ila koordinasyon sa mga drug enforcement authorities agod masiguro nga masunod ang nagakaigo nga proseso sa pag-atubang sang amo nga problema.

Sa karon, ginapangabay ni Agrasada ang mga ginikanan kag kabataan nga maglikaw sa mga indi maayo nga impluwensya, ilabi na sa mga aktibidad nga may kaangtanan sa ilegal nga droga, samtang nagapadayon ang kampanya sang barangay agod mapunggan ang paglapta sini kag makab-ot ang drug-cleared ukon drug-free status.