Target sang gobyerno nga mapanubo ang taripa nga ginapatuman sang Estados Unidos sa mga produktong Pilipino sa natalana nga pagsinapol upod kay President Ferdinand Marcos Jr. kag US President Donald Trump sa Miyerkules, Nobyembre 18.
Suno kay Trade Secretary Cristina Roque, lakip sa mga nagapanguna nga topiko nga istoryahan sang duha ka mga lider amo ang 12.5% nga taripa nga ginapatuman sang Washington sa mga produkto nga gina-export sang Pilipinas sa US.
Suno pa kay Roque nga luyag sang gobyerno nga panubuan ang ini nga taripa agud nga ang mga eksport sang pungsod mapasangkad sa merkado sang Amerika kag iban pa nga international market.
Tinutuyo man sini suno sa iya nga mapasanyog ang ikasarang sang mga produktong Pilipino nga makadungan sa world market.
Madumduman nga gin-angot sang Estados Unidos ang pag-import sang taripa sa gina-alegar kapaslawan sang Pilipinas nga atubangon sang nagakaigo ang pagsulod sang mga produkto nga ginhimo gamit ang pilit nga pagpangabudlay.
May-angot sini, ginpahibalo ni Roque nga ginpalab-ot na sa bahin sang US ang Joint Administrative Order (JAO) sang gobyerno nga nagatuyo sa pagsabat sang kasubong nga concerns.
Nagalaum ang tiglikom nga mangin kabahin ini sang paghinun-anon sa posible nga pagbag-o sa nagaluntad nga taripa.
Samtang, ginalauman naman nga magaabot sa Manila si Trump buwas nga adlaw, Martes, Nobyembre 17, kasunod sang iya pagtambong sa mga nagapanguna nga aktibidad sang ASEAN Summit kag antes ang iya natalana nga bilateral meeting kay President Marcos.











