Yara na sa estable nga kondisyon ang isa ka lalaki nga ginbuno sa Barangay Bungsuan, Dumarao, Capiz.
Ang biktima amo si alyas Toto, 23-anyos, samtang ang suspek amo si alyas Roy, 56-anyos, lunsay residente sang nasambit nga barangay.
Sa interview sang Bombo Radyo kay Police Lieutenant Russell Husmalaga, Officer-in-Charge sang Dumarao Municipal Police Station, iya ginpahayag nga nag-ugat ang insidente sa indi pag-intindihanay kag pagbinaisay sang duha antes ginbuno sang suspek ang biktima.
Suno kay Husmalaga, duha ka igo sang pagbuno sa likod kag isa sa atubang nga bahin sang lawas ang naangkon sang biktima.
Matapos ang insidente, nagpalagyo ang suspek kag tubtob sa karon nagapabilin nga at large, samtang padayon naman nga ginabulong sa isa ka pampubliko nga ospital sa Iloilo City ang biktima kag yara na sa estable nga kondisyon.










