-- ADVERTISEMENT --

Ginpatigayon sang Philippine Carabao Center-National Institute for Animal Sciences (PCC-NIAS) isa ka epektibo nga pamaagi sang pag-inseminar sa pagpadamo sang mga carabao, lakip na ang paggamit sang Artificial Insemination ukon AI.

Sa interview sang Bombo Radyo kay Dr. Myrtel C. Alcazar, OIC-Research and Development Station Chief sang PCC-NIAS sa WVSU, iya ginpahayag nga importante ang husto nga pagproseso kag kalidad sang semilya nga ginagamit sa artificial insemination agud mapaayo ang lahi sang mga carabao.

Paagi sa sini nga pamaagi, ginalauman nga madugangan ang produksyon sang gatas kag karne kag makahatag sang mas maayo nga oportunidad sa pangabuhian sang mga mangunguma.

Nahibalu-an nga ang PCC-NIAS nagdala pauli sang Gold kag Bronze Awards sa 2026 National Research Symposium nga gin-organisar sang Department of Agriculture-Bureau of Agricultural Research kag ginhiwat sa Best Western Plus Metro Clark sa Angeles City, Pampanga.