-- ADVERTISEMENT --

Ginpasidunggan sang Department of Trade and Industry (DTI) Region VI ang Roxas City bilang isa sa mga nagapasangkad sang creative industries sa bug-os nga rehiyon.

Ini bangud sa aktibo nga pagpanikasog sang mga lokal nga writers sa siyudad, paagi sa City Tourism Office, nga nakapublish sang pito ka book titles sang nagligad nga tuig nga ginsulat sang mga lokal nga author.

Ginpangunahan ni City Tourism Officer Bryan Mari Argos ang amo nga inisyatibo, kaupod ang mga Roxas City authors nga sanday Christian Acevedo, Gary Tabanera, Andrew Aponesto, kag Shane Martinez, nga kabahin sang Ilawod Book Series sang DTI Lunsod Lunsad.

Suno sa DTI, ang amo nga paghatag sang pagkilala kag suporta sa creative industries isa ka paagi agud mapabakod ang sektor nga kabahin sang nagadugang nga mga economic industries sa pungsod.

Nagpasalamat naman ang Roxas City sa DTI Region VI sa pagkilala sa kontribusyon sang siyudad sa pagpasangkad sang lokal nga literatura kag pagpalambo sang talento sang mga lokal nga writers.

-- ADVERTISEMENT --

Ini nga pagkilala nagapakita sang importansya sang pag-suporta sa mga lokal nga author kag sa industriya sang literatura bilang kabahin sang pagpauswag sang creative economy sa rehiyon.