Padayon nga ginapasangkad sang Roxas City Government, paagi sa City Health Office (CHO), ang mga programa nga natuhoy sa Reproductive Health Education sa bug-os nga 47 ka barangay sang siyudad.
Ini ang kabahin sang pagpatuman sang Population and Development Strategies nga nagatuyo nga mapalapnag ang kaalam kag paghangop sang mga pumuluyo sa responsable nga pagplano para sa ila pamilya.
Panguna nga ginatutukan sang programa ang pag-educate sa mga nagabusong tuhoy sa Responsible Parenthood, Family Planning kag Reproductive Health agud mahatagan sila sang nagakaigo kag husto nga impormasyon.
Paagi sa sini nga inisyatibo, ginapaabot nga mas mangin handa kag responsable ang mga ginikanan sa pag-atipan sang ila pamilya, lakip na ang paghimo sang husto nga desisyon para sa kahimsog kag kaayuhan sang tagsa nila ka miyembro.
Pinaagi sa padayon nga pagpalapnag sang kaalam sa 47 ka barangay, ginapakita sang Roxas City Government kag City Health Office ang ila pagpanikasog sa pagpalig-on sang kahimsog sang pamilya kag pagpasanyog sang responsible parenting.











