Nagapakita sang suporta ang local government sang Panay, Capiz sa kampanya para sa pagprotektar sang Irrawaddy dolphin ukon “Waddy,” nga isa ka talagsaon nga klase sang dolphin sa Iloilo-Guimaras Strait.
Sa pagpanguna ni Mayor Jonathan B. Besa, paagi sa Municipal Environment and Natural Resources (MENR) Office, ginapabaskog sang banwa ang mga inisyatibo para sa konserbasyon sang kadagatan kag responsable nga pagpangisda.
Kabahin ang Panay sa mga local government nga ginkilala sang DA-BFAR Region VI sa paglunsyar sang illustrated children’s storybook nga “Nakakita Ka sang Waddy?” sang Nobyembre 18, 2026. Nakabaton man ang banwa sang mga kopya sang libro agud magamit sa pag-edukar sa mga kabataan kag komunidad tuhoy sa importansya sang pagprotektar sa amu nga marine species.
Samtang, ginabulubanta nga 12 na lamang ka Irrawaddy dolphins ang nabilin sa Iloilo-Guimaras Strait. Isa sa mga nagapamahog sa ila amu ang aksidente nga pagkasab-it sa mga pukot sang mangingisda.
Bilang Alternate Co-Chairman sang Fisheries Management Area 11 Management Board, padayon man nga nagasuporta si Mayor Besa sa mga tikang para maprotektahan ang marine resources kag masiguro ang kaluwasan sang Waddy.











