-- ADVERTISEMENT --

Dismayado ang grupo nga Kadamay sa dalagan sang impeachment trial batok kay Vice President Sara Duterte, nga suno sa ila daw nagausik lamang sang tion bangud wala man sang tarong kag makakumbinsi nga mga ebidensya nga ginapresentar sa proseso.

Sa panayam sang Bombo Radyo kay Eufemia Doringo, Secretary General sang Kadamay, ginpahayag sini nga indi makahatag sang klaro nga sabat ang depensa bangud sa mga testigo nga ila ginapaatubang sa impeachment court.

Suno kay Doringo, sa baylo nga mapadulong sa pagpat-od sang kamatuoran kag pagpanabat sa mga alegasyon batok sa Bise Presidente, daw nagalawig lamang ang proseso nga wala man sang igo nga ebidensya nga makasuporta sa mga ginapahayag batok sa iya.

Dugang pa sang natungdan, importante ang proseso sang impeachment trial gani dapat lang nga hatagan ini sang respeto kag seryoso nga igtalupangod agud nga makahimo sang nagakaigo nga desisyon.