Nagpirma ang Pilipinas kag Australia sang bag-o nga Defense Cooperation Arrangement ukon DCA agud mapabakod ang ila relasyon kag pagbinuligay sa depensa, mga aktibidad militar kag pagsabat sa tion sang kalamidad.
Ginpirmahan ini ni Defence Secretary Gilberto Teodoro Jr. kag Australian Ambassador to the Philippines Marc Innes-Brown sa Eva Macapagal Cruise Terminal sa Manila South Harbor, nga nasaksihan man ni Australian Prime Minister Anthony Albanese.
Sa interview sang Bombo Radyo kay geopolitical analyst Denmark Suede, iya ginpahayag nga paagi sa kasugtanan mas mapabakod ang kooperasyon sang duha ka pungsod, ilabi na sa paghatag sang bulig sa tion sang kalamidad.
Suno kay Suede, isa ka halimbawa ang bagyo Yolanda sang 2013, nga naghatag ang Australia sang bulig sa Pilipinas para sa mga apektado sang kalamidad.
Dugang pa sini, ang kasugtanan nagatuyo nga mapadasig ang pagpatuman sang nagaluntad na nga mga kasugtanan nahanungod sa pagbisita kag mga aktibidad militar, nga nagapadayon sa masobra 30 ka tuig nga relasyon sa depensa sang duha ka pungsod.











