-- ADVERTISEMENT --

CAPIZ-Dugang nga mga atraksyon para sa mga kabataan ang ginaplano nga idugang sa Capiz Provincial Park agud mangin mas makawiwili nga pasyalan sang mga pamilya, suno sa pagbisita ni Governor Fredenil H. Castro sa nasambit nga parke subong nga adlaw, Nobyembre 20, 2026.

Kaupod si Acting Provincial Tourism and Cultural Affairs Office Officer Rophine Vesorio, ginlibot kag gin-usisa sang gobernador ang nagkalain-lain nga atraksyon kag disenyo sa parke, lakip ang plano nga pagbutang sang lima ka life-size sea creature mascots.

Ginalauman nga mangin dugang nga atraksyon ini para sa mga kabataan kag maghatag sang mas makawiwili nga eksperyensya sa mga bisita, ilabi na sa mga pamilya nga nagatinguha nga magtililipon kag magkinasadya sa tion sang kapaskuhan.

Ginbisitahan man ni Castro ang mga manugbaligya sang utan, prutas kag nagkalain-lain nga lokal nga pagkaon sa gwa sang parke, kun sa diin ginpahanumdom niya ang importansya sang pagmintinar sang katinlo sang palibot agud masiguro ang matawhay kag komportable nga pagpamalaklon.

Pinaagi sa padayon nga pagmonitor kag pagpauswag sang pasilidad, ginatinguhaan sang Gobyerno Probinsyal nga mapalig-on ang Capiz Provincial Park bilang isa ka matinlo kag makawiwili nga pasyalan nga makasuporta man sa lokal nga turismo kag pangabuhian sang mga manugbaligya.

-- ADVERTISEMENT --