MANILA-Ginapirmahan na ni President Ferdinand Marcos Jr. ang Republic Act 12327 ukon Basic Education Voucher Program Act nga nagatuyo nga mapalapad ang access sa dekalidad nga edukasyon kag mabuligan nga masolusyunan ang kakulangon sang mga classroom kag paghuot sang mga estudyante sa pampubliko nga eskwelahan sa pungsod.
Sakop sang programa ang mga estudyante halin Kindergarten tubtob Grade 12 nga kabahin sang middle-middle-income households kag mas manubo pa nga income classification, nga makabenepisyo sang government-funded vouchers kon mag-enrol sa mga pribado nga eskwelahan nga nagapartisipar sa programa.
Kwalipikado ang mga estudyante nga naghalin sa mga pampubliko nga eskwelahan nga ginakabig sang Department of Education nga congested, nagaestar sa mga lugar nga kulang ang pampubliko nga eskwelahan ukon wala sing malapit nga eskwelahan, kag wala sang ginatanyag nga angay nga subjects ukon electives para sa ila ginpili nga academic pathways sa senior high school.
Suno sa kasuguan, hatagan sang prayoridad ang mga estudyante halin sa imol kag low-income nga mga pamilya, samtang tugutan sila nga makapili sang pribado nga eskwelahan nga yara sa sulod sang tatlo ka kilometro halin sa ila puluy-an ukon ang pinakamalapit nga eskwelahan kon wala sing yara sa amo nga distansya.
Ang Department of Education ang magadeterminar sang balor sang voucher base sa commissioned research kag magarepaso sini kada tatlo ka tuig, samtang ginamanduan man nga i-disburse ang pondo sa mga eskwelahan sa sulod sang 60 ka adlaw matapos masumiter ang kompleto nga mga dokumento.
Samtang, ginabanta sa katapusan nga report sang Second Congressional Commission on Education nga nagalab-ot sa 165,443 ang classroom backlog sa pungsod, nga posible magsaka sa sobra 219,000 sa tuig 2028 kon iapil ang mga kinahanglan nga ipasaylo kag kumpunihon, rason nga ginapaabot nga makabulig ang bag-o nga programa sa pagpaibanan sang paghuot sa mga pampubliko nga eskwelahan, lakip ang mga yara sa probinsya sang Capiz.











