Nagtambong si Vice Ganda sa Philippines–Japan Film Festival 2026 sa Tokyo, Japan sa diin ang mga featured films nagalakip sang And The Breadwinner Is… kag Call Me Mother.
Ang Call Me Mother ang nagserbe nga opening film sang nasambit nga festival.
Kaupod ni Vice ang iya partner nga si Ion Perez sa biyahe nga isa ka kombinasyon sang trabaho kag bakasyon.
Ginpakigbahin niya sa social media ang ila mga litrato samtang nagapamasyar sa Japan, kag ang ila malipayon nga pag-updanay.
Magluwas sa pagtambong sa film festival, nagbisita man si Vice kay Punch, ang viral monkey nga nakit-an sa Ichikawa.
Ginkalipay naman ni Vice nga duha sa iya mga pelikula ang napilian sa una nga edisyon sang film festival.
Suno sa iya, isa ini ka dako nga kahigayunan agud mapakilala ang kultura sang mga Pilipino kag mga sugilanon sang mga Pilipino sa mas malapad nga pangkalibutanon nga tumalan-aw.
Nahibaluan nga ang duha ka pelikula gindirect ni Jun Robles Lana kag nangin kabahin sang Metro Manila Film Festival.
Ginlunsyar ang Philippines–Japan Film Festival bilang kabahin sang selebrasyon sang 2026 Philippines–Japan Friendship Year nga nagatuyo nga mapabaskog ang kultural nga kaangtanan sa tunga sang Pilipinas kag Japan
