ROXAS CITY – Ginkalangkagan sang pila ka mga kabataan kag ginikanan ang liwat nga pagbukas sang eskwelahan sa Adlawan Integrated School matapos nga ginpahanugutan nga maghiwat sang limited face to face classes.
Sa interview sang Bombo Radyo kay Ms. Allana Farnaso, suno diri nga sa ginabulubanta 1,000 ang kabug-osan nga populasyon sang ila eskwelahan, 375 sa karon ang nagasulod pinaagi sa in-person classes.
Suno pa diri, nga madamo sang rekisitos ang ila ginsumiter antes gin-aprubahan sang regional kag national level sang Department of Education (DepEd).
Aminado man ini nga lunsay manunudlo, estudyante kag ginikanan ang naga-adjust sa karon nga ‘new normal’ nga pagtulon-an, kun sa diin, half-day ang ila klase kag may yara sang 20 ka mga bangko ang yara sa isa ka hulot, agud mapasiguro ang social distancing.
Wala na ginahimo ang pagpadulong sa blackboard para sa pagsabat, ginabawalan ang pagdikit sa mga classmates kag ang pagkaon sa sulod sang buluthoan.
Ginklaro man sini nga wala sang pinilitay sa pagsulod sang face to face classes, kag magapabilin sa modular learning ang mga indi luyag sa in-person classes.
Apisar nga indi fully vaccinated ang isa ka bata, mahimo ini sa gihapon makapartisipar sa klase, kinahanglan lamang nga may consent sang ginikanan.
Nahibaluan nga nagsugod ang limited face to face classes sa amu nga eskwelahan sang Marso 9.
