Mas ginpili sang pila ka mga pasahero ang pagbyahe sang mas temprano agud malikawan ang pagdugok sang mga tawo sa mga terminal, ilabi na subong nga ginapaabot ang pagdamo sang biyahero bangod sang Semana Santa.
Sa interview sang Bombo Radyo kay Joyzel Mogato, isa ka pasahero, iya ginpahayag nga magapadulong siya Janiuay, Iloilo agud nga i-selebrar sang Semana Santa.
Suno kay Mogato, mas manami ang magbiyahe sang aga bangod mas malinong pa ang dalan kag mas hapos makasakay kumpara sa oras nga damu na ang mga tawo.
Pahayag pa niya, nakabulig man ini agud malikawan ang dugang nga stress kag kapoy sa pagbyahe.
Samtang, padayon man ang pagdamu sang mga pasahero sa nagkalain-lain nga terminal sa probinsya sang Capiz agud nga maghingagaw pauli para maka-upod ang pamilya kag mag-obserbar sang Semana Santa.
