Ginakabig nga isa ka tumalagsahon nga stress-relief trend ang nagasikat sa karon sa China: ang paggamit sang mga pacifier nga para sa tigulang. Linibo ka mga kabataan nga Tsino ang nagabakal sini sa paglaom nga makabulig ini nga mabuhinan ang ila nga stress, anxiety, kag insomnia.
Bangud sa mga problema kaangay sang pressure sa trabaho, mga utang, kag kumplikado nga relasyon, madamo sang mga pamatan-on ang nagapangita sang pamaagi agud mapakalma ang kaugalingon.
Ang mga adult pacifier, nga ginabaligya online sa balor nga halin sa 10 Yuan ukon masobra 79 pesos tubtob 500 Yuan ukon masobra 3,900 pesos, ang nangin isa ka popular nga solusyon. Suno sa mga online seller, linibo ka mga pacifier ang ila nga nagakabaligya kada bulan.
Ginpaathag sang mga psychologist sa China nga ang amo nga trend ang may kaangtanan sa konsepto sang “regression phenomenon.” Ini amo ang teorya nga kun ang isa ka tawo ang nagapangatubang sa tuman nga stress, nagabalik sila sa mga ginapanghimo nila sang sila bata pa, kun sa diin ang pacifier ang nagasimbolo sa seguridad kag katawhay.
Madamo sang naggamit ang nagapahayag nga nakabatyag sila sang kalinong kag kalmado nga palibot kag mas makatulog pag ginagamit ini. Subong man, nagpaandam ang mga eksperto sa ikaayong-lawas angut sa mga posible nga malain nga epekto sini.
Suno kay Dr. Tang Caomin sang Sichuan University, ang paggamit sang pacifier sa madugay nga inoras para sa mga katigulangan ang mahimo magtuga sang “temporomandibular joint disorder” ukot sakit sa panga, halit sa gilagid, kag mangin peligro sang suffocation pag ginagamit samtang nagakatulog.
Ang pinasahi nga trend nga ini ang isa ka halimbawa sang mga tumalagsahon nga pamaagi nga ginatestingan sang mga tawo agud batuan ang stress sang moderno nga pagpangabuhi.
