Ginakabig nga daku nga bulig sa mga pumuluyo sang syudad sang Roxas ang bag-o nga AI Traffic Signalization System.
Ini matapos nga pormal nga ginturn-over sang Land Transportation Office (LTO) Region VI ang signalization system sa Roxas City Government.
Sa interview sang Bombo Radyo kay Engineer Juvy Tabaranza, City Government Assistant Department Head-I, iya ginpahayag nga makabenepisyo ini sa mga pumuluyo bangud makabulig sa pagpahagan-hagan sang trapiko sa mga dalan sang syudad.
Suno kay Tabaranza, ang sistema nagagamit sang makabag-o nga teknolohiya nga automatic nga naga-adjust sang traffic lights depende sa kadamuon sang mga salakyan nga nagaagi sa dalan.
Paagi sini, ginalauman nga mas mapadasig ang biyahe sang mga motorista kag commuter kag mas mapahapos ang paghulag sang trapiko sa syudad.
