ROXAS CITY – Gindepensahan karon sang re-elected Capiz 1st District Congressman ang kaugalingon batuk sa mga akusasyon sang kampo sang nalutos nga si Governor Antonio del Rosario nga ginlaglag ini sang mga kaalyado sa partido Liberal.
Ginpahayag ni Congressman Emmanuel Billones Sr., bisan san-o wala ini nagpabaya ukon naghudas kay del Rosario nga ila kaupod sa LP, sa baylo hugot ang iya nga pagsuporta diri.
Sa pagkamatood suno sa kongresista ginkasubo sini ang nangin resulta sang eleksyon sa pagka-gobernador, apang ginarespeto ang desisyon sang mga Capizeño.
Naintiendihan man sini ang nangin reaksyon sang mga utod ni outgoing governor del Rosario, bangud preska pa sa ila ang resulta sang eleksyon.
Apang wala na sila sang sarang mahimo pa kundi batunon na lamang sang hugot sa ila tagipusoon ang kamatuoran.
Ginkumpirma man sang kongresista ang ginbuy-an nga pahayag ni Panay mayor elect Felipe Barredo nga antes ang pinili-ay ginpalab-ot sini kay del Rosario ang sentimyento sang mga Panayanon.
Suno sa opisyal nga nag-atubangay sanday del Rosario kag Barredo sa diin ginprangka ini sang alkalde nga indi siya makapasalig sa gobernador sang kadalag-an sini sa banwa sang Panay, bangud madamo ang may hibubun-ot kay del Rosario.
Apang nagpamalibad si Congressman Billones nga maghatag sang dugang nga detalye, agud indi na maglala pa ang sitwasyon
Samtang aminado ini nga dismayado siya sa nakuha nga boto sa banwa sang Panay.
Gin-ako sang opisyal nga naglaum ini nga mataas ang makuha nga boto bangud taga banwa sang Panay man ini.
Apang bisan indi siya malipayon sa nakuha nga boto, hugot sini nga ginabaton sa tagipusoon ang desisyon sang mga pumuluyo sang Panay.
