ROXAS CITY – Pormal na nga gintugyan City Mayor Ronnnie Dadivas ang mga armas luthang sa Roxas City Police Station sa ginpatigayon nga Turn-over Ceremony of Donated Firearms.
Ini ang ginpahayag ni Police Lt. Col. Ricardo Jomuad Jr., hepe sang Roxas City PNP sang mainterview sang Bombo Radyo.
Suno kay Jomuad nga daku ini nga bulig para sa hanay sang pulisya agud madugangan ang ila mga kagamitan sa pagmentinar sang seguridad kag kampanya batuk sa iligal nga droga sa siyudad.
Kalakip sa ma ginturn-over amo ang 29 ka 9mm nga short firearms kag 20 ka 5.56mm/M4 long firearms kag may mga bala.
Nahibaluan nga nag-expired na ang lisensya sang mga armas luthang nga ginpahulam anay sang lokal nga gobyerno sang siyudad.
Apang, ginpakamaayo na lamang sang nasambit nga alkalde nga ihatag sa mga kapulisan sang Roxas City PNP.
Nagapasalamat naman si Jomuad kay Dadivas sa ginhimo nga kaayuhan kag pagkabalaka sini sa hanay sang pulisya.
