ROXAS CITY – Nagpasaka sang kaso sa office of the ombudsman ang alkalde sang banwa sang Tapaz batuk sa engineer sang Capiz 2nd Engineering District, Department of Public Works and Highways (DPWH).
Sa interview sang Bombo Radyo kay Tapaz Mayor Roberto Nonong Palomar nga kaso nga Falsification of Public Documents ang ginpasaka sini nga kaso batuk kay Eng. Dene Baldonado.
Ini may kaangtanan sa accomplishment report nga ginpakita sang amo DPWH angut sa road concreting sa Barangay Artuz sa amo nga banwa kun sa diin nasaad nga 97.37 porsyento na nga natapos.
Suno kay Palomar nga madamo na sang mga residente ang nagpalab-ot sa iya sang reklamo rason nga ila gintsekyar ang ginakaayo nga dalan.
Ginpahayag sang alkalde nga halos indi makalab-ot sa 50 porsyento ang pagpakaayo sang amo dalan kabaliskaran sa report ni Baldonado.
Dugang pa ni Palomar nga tuman kalayo ang report sang district engineer sang gintsekyar nila ang lugar.
Magluwas diri, ginpasalig man sila sang DPWH nga sa Enero sini nga tuig na ini kuntani matapos apang tubtob subong padayon sa gihapon nga ginakaayo kun sa diin ang SDB Construction Firm ang nagaserbi nga contractor sa amo nga proyekto.
Mahibaluan nga sang tinalikdan nga tuig 2019 pa nagsugod sa pagpakaayo sang mga dalanon.
Ginapahayag nga nagalab-ot sa P48 million ang budget nga ginpain nga budget sa nga road concreting para sa nasambit nga lugar.
Kumpyansa naman si Palomar angut sa ginpasaka sini nga kaso batuk kay Baldonado bangud may yara ini sang mga nagakaigo nga mga dokumento nga nagapamatuod nga sala ang iya accomplishment report.
