ROXAS CITY —
Ginahulat na lamang sang Department of Trade and Industry ang implementing guidelines sang programa nga Pondo sa Pagbabago at Pag-asenso ukon P3 agud makapautang sa magagmay nga mga negosyante sa pungsod.
Ang programa ang nadihon kasunod sang direktiba ni Pres. Rodrigo Duterte nga tapnaon na ang mga Indian nationals ukon Bombay nga nagapautang sang 5-6 sa mga Filipino.
Suno kay DTI – Capiz provincial director Ms. Ermelinda Pollentes, target nga benepisyaryo sang P3 ang mga market vendors kag agribusiness owners nga nalakip sa micro, small and medium enterprises ukon MSMEs.
Pinaagi sa programa sarang makautang ang mga magagmay nga negosyante sang minimum nga P5,000 tubtob P300,000 sa interest rate nga 2.5 percent lamang kada bulan.
Ini ang tuman ka nubo kun ipaanggid sa halos 20 percent nga interest rate nga ginasukot kada adlaw kun magpautang sang 5-6 ang mga Bombay kag ang iban man nga micro-finance ukon lending institutions.
Ginalauman nga masugoran ang pagpatuman sang programa subong nga bulan kun sa diin pinaagi sa Small Business Corporation nga attached agency sang DTI, ipaagi nila sa pinili nga mga partner micro-finance institutions ang pagpautang sang kantidad sa magagmay nga negosyante.
