TAPAZ, CAPIZ – Dakop sa akto ang 24-anyos nga lalaki nga may ginahuptan nga indi lisensyado nga armas-luthang sa Sitio Hacienda Conchita, Barangay San Francisco, Tapaz, Capiz.
Ang arestado amo si alyas “Toy-toy,” manuglibod sang isda, kag residente sang nasambit nga lugar.
Sa impormasyon nga nagikan sa Tapaz Municipal Police Station, nakabaton sila sang impormasyon halin sa Punong Barangay sang Brgy. San Francisco nga may nagapinalupok sa lugar.
Gilayon nga nagresponde ang katapo sang kapulisan kag pag-abot sa lugar ila naaktuhan ang arestado nga may uyat nga isa ka improvised 12-gauge shotgun.
Dugang nga nakumpiskar sa arestado ang isa ka 12-gauge shotshell, kag isa ka sling bag.
Yara na karon sa kustodiya sang Tapaz PNP ang arestado kag nagapangatubang sang kaso nga paglapas sa Republic Act No. 10591 ukon ang Comprehensive Firearms and Ammunition Regulation Act.
Padayon ang imbestigasyon sang kapulisan angut sa nasambit nga insidente.
