ROXAS CITY – Ginpatay sang isa ka amay ang tatlo ka tuig nga bata antes nagpanginmatay sa sulod sang ila balay sa Barangay San Jose, Roxas City.
Sa exclusive interview sang Bombo Radyo Roxas kay Nanay Delia, tiya ni Jaypee Capapas, 31-anyos ginpahayag sini nga ginkakibot na lamang sini sang makita nga nagabitay na ang hinablos sa kusina.
Suno kay Nanay Delia antes ang insedente, ginmanduan siya ni Jaypee nga magpanghawan sang abalong sa guwa sang balay.
Apang nakibot na lamang ang tiya sa iya nga pagbalik kag makita nga nakabitay na si Jaypee gamit ang nylon cord sa kusina.
Nagpangayo ini sang bulig sa mga kaingud balay nga gilayon naman nag-alabutan.
Sa pagkabalaka sa anak ni Jaypee nga nagakatulog ginpadulungan ni Nanay Delia ang kuarto apang amo na lamang ang iya kakibot sang makita sini nga may electric cord sa liog sang bata kag wala na ini nagaginhawa.
Nagaguwa sa inisyal nga imbestigasyon sang Roxas City PNP nga una nga ginpatay ni Jaypee ang menor de edad nga anak pinaagi sa pagkuga gamit ang electrical cord antes ini naghikog.
Sa karon indi pa maathag kun ano ang nagtulod kay Jaypee nga patyon ang anak kag pagkatapos nagpanginmatay man ini
Nahibaluan nga nagatrabaho sa iban nga pungsod ang asawa ni Jaypee kag ini ang nabilin para mag-atipan sa duha ka mga anak kaupod ang tiya nga si Nanay Delia.
