ROXAS CITY – Indi matakos ang kasadya nga nabatyagan sang pamilya ni Cadet 1st Class Rosemel Dogello, 21—anyos nga isa sa masobra 16,000 nga kwalipikado nga aplikante sa PMA Examination Center.
Sa nasambit nga numero, masobra 1,000 lamang nga mga PMA Aspirants ang nakapasar matapos nga magkuha sang exam nga ginhiwat sa Akademya Militar sang Pilipinas sa Fort Gregorio del Pilar sa Baguio City.
Sa interview sang Bombo Radyo kay Master Sgt. Romel Dogello amay sang PMA cadet top 5, ginpahayag sini nga sila mismo wala nakahibalo nga nadala sa top 5 ang ila bata bangud wala man sini ginhambal sa ila.
Suno sa amay, apisar nga nagatawag ang ila bata sa ila wala sini ginpakigbahin nga nadala siya sa top 5 kag ang nahibaluan lamang nila nga maggradwar na ini sa pagiging suldado, rason nga dako na lamang ang ila kakibot, kasadya kag pagpasalamat sang natukiban ini.
Pahayag sini nga ang pagiging suldado luyag sang iya anak bangud suno sa iya siya ang ginalantaw sini nga idolo ukon inspirasyon agud sudlon ang nasambit nga kurso kung sa diin indi upang sa iya ang pagiging babaye kag sarang pamatud-an nga sarang matupungan ang abilidad sang isa ka lalaki.
Si Rosemel ang ika-duha nga bata sa ila apat nga mag-ulutod.
Natalana naman nga magagradwar ini sa palaabuton nga Mayo 18, 2024 nga pagahiwaton sa Fort Del Pilar, Baguio City kag magagradwar bilang magna cum laude sang Bagong Sinag Class of 2024.
