ROXAS CITY – Ginalaoman nga magasentro sa pagpasanyog sang turismo ang natalana nga pag-atubangay ni US President Donald Trump kag North Korean leader Kim Jong Un nga magasugod subong nga adlaw.
Ini ang ginpahayag ni Bombo International correspondent Jun Felix, tubong Caballero, Guimba, Nueva Ecija nga nabase subong sa Dong Da District, Hanoi City, Vietnam sang mainterview sang Bombo Radyo Roxas.
Suno kay Felix, ginakabig nga makasaysayan ang liwat nga pag-atubangay sang duha ka mga kilala nga lider sa kalibutan.
Natalana nga magkitaay sanday Trump kag Kim sa isa sa mga downtown venues nga Government Guest House, nga anay balay sang colonial governmeny sang Tonkin.
Ordinaryo lamang nga adlaw kag indi apektado ang operasyon sang mga establisyemento, opisina, buluthuan kag mga negosyo sa pagkit-anay sang duha ka mga kilala nga lider apang istrikto ang seguridad nga ginapatuman sang mga otoridad.
