ROXAS CITY – Patay na sang masapwan ang anay barangay chairman sa Barangay Carmencita, President Roxas, Capiz.
Ginkilala ang biktima nga si Wilfredo Capapas, 79 anyos, anay barangay chairman sang Barangay Sto. Niño sang nasambit man nga banwa.
Sa interview sang Bombo Radyo Roxas kay SPO4 Solon Billanes sang President Roxas PNP, ginpahayag sini nga nakit-an na lamang sang isa ka concerned citizen ang lawas sang biktima nga nagapautaw-utaw sa nasambit nga suba kag wala na sang kabuhi.
Nahibaluan nga sadtong Pebrero 25 pa sang ulihi nga nakit-an sang iya pamilya ang biktima kag ginkatingala pa nga wala pa ini makapauli.
Mismo ang anak sang biktima nga si Barangay Chairman Reynaldo Capapas ang nagkompirma nga amay sini ang nasapwan nga bangkay sa nasambit nga suba.
Kumbinsido naman ang pamilya sang biktima nga wala sang foulplay sa pagkamatay sang biktima kag ginapatihan nga nadanlog ini nga nagresulta sa iya nga pagkalumos.
