ROXAS CITY- Magapangatubang sang panumbungon nga paglapas sa Republic Act 9165 ukon Comprehensive Dangerous Drugs Act of 2002 ang isa ka anay preso nga liwat nadakpan sa ginkasa nga drug buybust operation sang mga katapo sang Station Drug Enforcement Unit (SDEU) sang Roxas City PNP sa Barangay 5, Roxas City.
Ginkilala ang naaresto nga si Andrew Lara, 36 anyos kag residente sang Barangay Punta Tabuc, Roxas City.
Sa interview sang Bombo Radyo sa tagpamaba sang Roxas City PNP nga si Police Master Sergeant Ramil Arcangeles, ginpahayag sini nga naaresto sadto ang suspek sa isa man ka drug buybust operation kag nabilanggo.
Apang nahilway matapos nag-avail sang plea bargaining agreement.
Matapos na-monitor nga nagbalik ini sa iya ilegal nga aktibidad liwat nga ginpaidalom sang mga otoridad sa monitoring ang suspek antes ginkasa ang operasyon.
Narekober sa suspek ang 10 sachets sang shabu, P10, 000 nga marked money kag cellphone.
Ginabulubanta nga nagalab-ot sa P67,000 ang market value sang 10 ka sachets sang shabu.
