PONTEVEDRA, CAPIZ- Natupok ang isa ka ancestral house matapos nga nasunog sa Barangay Poblacion Ilawod, banwa sang Pontevedra.
Ang amo nga ancestral house ang ginapanag-iyahan ni Felomino Burata Dy.
Sa interview sang Bombo Radyo kay Jane Burata, gumangkon sang tag-iya sang balay, ginpahayag sini nga madasig nga ginlamon sang kalayo ang amo nga puluy-an.
Dugang pa sini, nga base sa ila nga pagpangusisa, posible nga bangud sa electrical wiring ang gintunaan sang sunog bangud suno sa iya amo ang ila una nga nakita nga ginlatayan sang kalayo.
Nahibaluan nga human sang mixed materials ang amo nga puluy-an.
Magluwas sa natupok nga ancestral house, partially burned man ang isa ka puluy-an kag nadalasa man sa sunog ang isa ka salakyan nga naka-park.
Maswerte naman nga wala sang naulamid nga kabuhi sa amo nga sunog, apang wala sang may nasalbar nga mga kagamitan magluwas sa cellphone ang nasunugan.
Sa karon, padayon nga gina-imbestigaran sang mga katapo sang Bureau of Fire Protection-Pontevedra ang nasambit nga sunog agud matumod ang matuod nga gintunaan kag kun pila ang kahalitan nga ginbilin sa amo nga mga panimalay.
With a report from Bombo Sunnie Mae Batencila
