ROXAS CITY — Ginaduso ni City Councilor Paul Ivan Baticados nga magpasar ang siyudad sang Anti-Hoarding and Panic Buying Ordinance bilang proteksiyon sa mga pigado nga pumuluyo sa tion sang mga emerhensiya.
Sa ginpatigayon nga sesyon sang Roxas City Council, ginpahayag ni Baticados sa iya privileged speech nga kinahanglan makaangkon sang mekanismo ang gobyerno sang siyudad nga naga-regulate sa baklanay sang nagapanguna nga mga balaklon agud mangin patas ang tanan sa tion sang krisis ukon kalamidad.
Suno sa iya, kinahanglan nga malimitahan lamang ang kadamuon sang mga produkto nga sarang mabakal sang isa ka indibidwal ukon tag-iya sang establisimento sa tion sang kalamidad.
Ginhalimbawa ni Baticados ang nagakahinabo nga panic buying bangud sa coronavirus disease 2019 (COVID-19) sa diin nagkalaubos na ang mga alcohol, face masks, kag iban pa nga mga kinahanglanon nga produkto sa merkado.
Pagamultahan ang indibidwal nga madakpan nga magalapas sa ordinansa sang P1,000 para sa first offense, P2,000 sa second offense, kag P3,000 sa third offense.
Mahimo naman nga ma-revoke ang business permit ukon mapasirado ang establisimento sang tag-iya nga magalapas sa kasuguan.
Pasado na sa first reading sang konseho ang ginaduso nga ordinansa ni Baticados kag nagalaum ini nga dalayon na nga mapasar ang laye sa masunod nga semana.#
