Normal lamang nga makabatyag sang kahadlok kag indi maintindihan nga balatyagon sa tion nga ang isa ka tawo makabatyag sang stress.
Magluwas sa pag-atipan sa ika-ayong lawas, importante man nga atipanon ang mental health ilabi na kun ang isa ka tawo yara lamang sa sulod sang balay.
Yari ang pila sa mga dapat himuon kun makabatyag sang stress;
1. Kun gina-akigan sang ginikanan kag sa pamatyagan ikaw lang ang masami nga sala, sa baylo nga maakig, istoryahon ang mga ini makipag-bonding sa ila agud maintindihan ang nabatyagan sa magtimbang nga bahin.
2. Nahidlaw sa mga abyan? Mahimo nga gamiton ang social media pinaagi sa pagvideo call, chat ukon text agud kamustahon ang isa kag isa.
3. Magpangita sang kalingawan, testingan nga matun-an ang isa ka hobby, skills, ukon talent. Makabulig ini agud mabuhinan ang anxiety.
4. Maghimo sang routine kag tinguhaan nga sundon ini, mahimo nga magbulig sa mga ulobrahon sa balay.
5. Mag-ehersisyo agud balhason, himuon ang mga dance challenge ukon mahimo man nga ganyaton ang mga kaupod sa balay.
6. Mangin smart kag responsable nga netizen, kag ang katapusan, kinahanglan nga makahibalo mag-appreciate sang kabuhi mangin mapinasalamaton adlaw-adlaw sa mga grasya nga nabaton.
