Roxas City – Arestado ang 4 ka mga indibidwal matapos nga madakpan nga nagapatigayon sang illegal gambling ukon board game sang katapo sang kapulisan sa Barangay Baybay, Roxas City takna alas 11:30 kagab-i Marso 13.
Ginkilala ang mga suspetsado nga sanday Ryan Jacinto Benid, 42-anyos, residente sang Purok 1, Fernan Villanueva Bellosillo, 27-anyos, residente sang Purok 2, Barangay Libas, Alexander Sereneo Delay, 52-anyos, residente sang Altavas Boulevard Barangay Baybay kag Darleno Apilit Barona 60-anyos kag residente sang Sitio San Juan Barangay Baybay sining syudad.
Sandig sa nakuha nga impormasyon sang Roxas Component City Police Station, nakabaton sila sang impormasyon nga may yara sang pila ka mga persona nga nagapatigayon sang illegal nga pasugal.
Bangud sini, gilayon nga ginpadulongan sang mga otoridad ang nasambit nga lugar, kag natigayon nga madakpan sa akto ang mga ini nga nagapataya sang board game.
Nakuha sa posesyon sang mga nagkaladakpan ang tatlo ka P5.00 coins, board game nga human sa semento, marker pen, apat ka plastic nga bangko, chalk kag P597.00 sa nagkalain-lain nga denominasyon.
Magapangatubang ang mga ini sa kaso nga paglapas sa Presidential Decree 1602 ukon Anti-illegal Gambling Law.
Sa karon, nagapabilin sa kustodiya sang Roxas Component City Police Station ang apat ka mga arestado para sa nagakaigo nga disposisyon.
