ROXAS CITY – Karsel ang ginsudlan sang apat ka mga motornappers matapos maaresto sang mga pulis sa Barangay Poblacion, Tapaz, Capiz.
Ginkilala ang mga suspek nga sanday Rolindo Catalan 18-anyos sang Barangay Calaan, Panit-an, Bryan Bendoy alyas Coycoy sang Poblacion Ilaya, Panit-an, Jerson Lucion sang Poblacion Ilaya, Panit-an kag Jeric Paniare sang Barangay Cogon, Roxas City.
Nadakpan ang apat sa checkpoint sang mga pulis sa diin wala sila sang may mapakita nga dokumento.
Nagduda ang mga pulis bangud sa panghulagon sang mga suspek kag sang ginpamangkot kun diin makadto sa banwa sang Tapaz, wala sila sang may matumod nga lugar.
Bangud diri, gindala sila sa police station kag ginpaidalum sa imbestigasyon tobtob nag-ako ang mga ini nga indi sila ang tag-iya sang motorsiklo.
Nahibaluan pa nga gin-ako man sang apat nga tricycle ang ila nga ginmotornap, apang ginkuhaan lamang sang sidecar kag ginbilin sa isa ka barangay sa banwa sang Panit-an, Capiz.
Nahibaluan nga antes pa nakalab-ot ang mga suspek sa Tapaz gin-alarma na sang Roxas City PNP ang kapulisan sa kabanwahanan angut sa ginmotornap nga tricycle sang isa ka residente sa syudad sang Roxas.
