Naglab-ot na sa 37 ang napatay sa paglugdang sang M/V Trisha Kerstin 3 matapos narekober ang dugang nga apat ka bangkay sang Biernes, sa kadagatan malapit sa Hadji Muhtamad, Basilan.
Padayon ang search and rescue operations sang Philippine Coast Guard samtang gina-imbestigaran ang mga report nga posible mas madamo ang sakay sang barko kun ikumparar sa nasaad sa passenger manifest.
Sa subong 10 ka pasahero ang nagapabilin nga missing.
Samtang, siyam sa 11 ka mga bangkay nga narekober sang Huwebes, ang nakilala na sang ila mga himata.
Ang mga biktima nagikan sa Zamboanga City kag Sulu, lakip ang isa ka senior citizen kag isa ka anum ka tuig nga bata.
Duha ka bangkay naman sang lalaki ang nagapabilin ang wala pa makilala.
Matandaan nga naglugdang ang barko sang Enero 26 samtang padulong sa Jolo, Sulu halin sa Zamboanga City.
Kapin sa 300 ka mga pasahero ang nakaluwas.
Sa pihak sini, ginmando sang Department of Transportation ang temporaryo nga pag-untat sang mga barko sang Aleson Shipping Lines samtang nagapadayon ang imbestigasyon.
Padyon naman ang rescue and recovery operations samtang ginapasiguro sang mga otoridad ang kaluwasan sang mga survivors kag padayon ang imbestigasyon sa insidente.
