ROXAS CITY – Nagalaum ang mga residente sang apektado nga barangay sa banwa sang President Roxas kag Pilar nga mahatagan sang solusyon ang ila nga problema sa mabaho nga kemikal nga ginahaboy sang Capiz Sugar Central sa mga suba nga direkta nga nagailig sa dagat sa diin nahamtang ang ila nga palangabuy-anan.
Sa petition letter nga pirmado sang 50 ka indibidwal, nakapagkit ang problema nga ginatuga sa ila palangabuy-anan sang kemikal nga gikan sa nasambit nga facilidad.
Suno kay Merlinda Almorin, isa sa mga petitioner, may lima ka mga Sitio sa Barangay Dulangan kag tatlo ka mga barangay sa banwa sang President Roxas ang apektado sang ginahaboy nga higko ukon kemikal nga gikan sa ginaproseso nga mga tubo.
Madugay na ang nasambit nga problema sa diin ginpalab-ot na nila ini sa Department of Environment and Natural Resources, apang tobtob sa karon wala pa sang aksyon ang nasambit nga ahensiya.
