Napilian si Archbishop Gilbert Garcera sang Lipa sa 130th Plenary Assembly sang Catholic Bishops’ Conference of the Philippines (CBCP) sa Anda, Bohol bilang bag-o nga presidente sang CBCP.
Magabulos siya kay Cardinal Pablo Virgilio David sang Kalookan, nga magatapos sang iya ikaduha nga termino sa Nobyembre 2025.
Si Garcera ang pormal nga magapungko sa posisyon sa Disyembre 1, 2025, sa sulod sang duha ka tuig nga termino.
Sa pagpanalawsaw sang Bombo Radyo, nahibaluan nga si Obispo Garcera ang natawo sadtong Pebrero 2, 1959 sa Magarao, Camarines Sur.
Gin-ordinahan bilang pari sang 1983 para sa Arkidiosesis sang Caceres, kag nangin obispo sang Daet halin 2007 tubtob 2017.
Siya ang gintangdo bilang Arsobispo sang Lipa sang 2017, nga may kapin sa 3.3 milyones ka mga tumuluo.
Nagserbisyo man siya bilang chairman sang CBCP Commission on Mission kag Commission on Family and Life, kag nangin kabahin sang CBCP Permanent Council bilang tiglawas sang Southeast Luzon.
Bilang bag-o nga pinuno sang CBCP, si Garcera ang ginalauman nga magapanguna sa mga obispo sa moral, pastoral, kag sosyal nga mga isyu, samtang ginapadalom ang konsultasyon sa mga laiko sa idalum sang sinodal nga pagpanglakaton sang Simbahan.
Si Garcera naman ang nakabaton sang panamyaw gikan sa mga kaparian kag mga pumuluyo sang mga probinsya sang Camarines sa diin siya naghalin kag nagserbisyo sa malawig nga panahon.
