CAPIZ- Padayon nga nagapangayo sang aksyon ang Arkidiyosesis sang Capiz batok sa padayon nga paglapnag sang iligal nga huygo sa pungsod, partikular na ang online gambling.
Sa interview sang Bombo Radyo kay Rev. Fr. Emilio Arbatin, tigpamaba sang Arkidiyosesis sang Capiz, iya ginpahayag ang may kaangtanan sang panawagan ni His Excellency Pablo Virgilio Cardinal David nga magpatigayon sang gilayon nga tikang ang gobyerno agud nga matapna ang madasig nga pagdamo sang online gambling sa Pilipinas.
Dugang pa sini, nagakadapat nga hatagan sang pagtamod ang padayon nga paglapnag sang mga iligal nga huygo nga may dalagkuan nga pusta bangud nga may negatibo ini nga epekto sa kabuhi sang tawo, sa ila nga pamilya, kag sa bilog nga komunidad. Ginsambit man sini ang mga ahensya sang gobyerno nga ginakabig nila nga indi bastante ang mga ginahimo sini sa pagtapna sang amo nga isyu.
Nahibaluan nga padayon nga ginpalapnag sang mga pari ang ihibalo hanungod sa epekto sang illegal gambling sa mga komunidad pamaagi sang mga aktibidad kaangay sang pagbisita sa mga barangay kag pag-organisar sang mga seminar agud makahatag sang tama nga impormasyon kag solusyon.
Ginsiling pa sini nga ang simbahan ang padayon nga magapatigayon sang mga tikang agud maghatag sang edukasyon kag magbinuligay ang tagsa-tagsa agud matapna ang mga kasubong sini nga bisyo kag suno pa siya nga indi dapat madulaan sang paglaom, kundi pili-on ang kaayuhan, kag labaw sa tanan, magsalig sa Diyon nga siyang magasustento kag maghatag sang kapawa sa tagsa ka kabuhi.
Interviewed by Bombo Francis Biñas
