Ginpasangkad pa sa karon ang African Swine Fever (ASF) Task Force sang banwa sang Panay ang ila pagbantay kag preparasyon kasunod sang nagadamo nga kaso sang nagkalamatay nga mga baboy sa lugar.
Sa interview sang Bombo Radyo kay Panay Capiz Mayor Jonathan Sonny Besa, iya ginpahayag nga gilayon ini nga nagpatawag sang pagsinapol agud paga-istoryahan ang kahimtangan sang posibleng paglapta sang African Swine Fever (ASF) sa banwa.
Kabahin sang katungdanan sang ASF Task Force sa banwa amo ang pagmonitor kag pag-inspeksyon sa mga slaughterhouse kag mga nagabaligya sang karne sang baboy agud masiguro nga may nagakaigo nga permit kag nagasunod sa mga regulasyon.
Suno sa alkade, nagahulat man ang LGU Panay sang opisyal nga resulta sang mga sample nga ginpadala sa Provincial Veterinary Office kag sang rekomendasyon sang Department of Agriculture (DA) kun ano ang maayo nga pagahimoon.
Nahibaluan nga ang banwa sang Panay ang nalakip sa mga lugar nga gin-identify bilang red zone bangud sa posible nga kaso sang ASF.
