Asosasyon sang mga palahubog, nagprotesta bangud sa tuman kamahal nga presyo sang ilimnon

Nagtipon ang Ghana Drunkard Association agud ipahayag ang ila nga hugot nga pagpamatok sa padayon nga pagtaas sang presyo sang mga ilimnon nga alak sa ila nga pungsod.

Sa isa ka hublag-protesta nga ginpatigayon sa syudad sang Accra, ginhinyo sang grupo sa gobyerno nga gilayon nga sabton ang ila nga ginahinyo kag kag hatagan sang solusyon ang nagatinaas nga presyo sang mga alak.

Suno kay Moses Onyah, kilala man bilang “Dry Bone” kag Presidente sang asosayon, nabatyagan sang minilyon nga miyembro ang 15 percent nga pagsaka sang presyo ng alak. Ginhinambitan man sini nga samtang naganubo ang presyo sang iban nga balaklon bangud sa mabaskog nga ekonomiya, nagapabilin nga mataas ang presyo sang alak.

Naghatag sang tatlo ka semana nga ultimatum sa gobyerno ang ila grupo agud masolusyunan ang isyu, kag nagpanawagan man sila sang bulig gikan sa ila nga anay Presidente nga si John Dramani Mahama. Ginhatagan pagtamod ni Onyah nga handa sila nga magpatigayon sang mas lapnagon nga protesta sa tion nga mapaslawan ang gobyerno nga pamatian ang ila nga panawagan.

Apisar nga may mga kahalam-utan nga pangalan, ang Ghana Drunkards Association (GDA) ang isa sa mga pinakaki­lala nga asosasyon sa Ghana, nga may ginabanta nga masobra 6.6 million members.

Indi lamang nahanungod sa imnanay ang GDA kundi kilala man ang grupo sa pagduso sang responsable nga pag-inom, kalakip ang mga kampanya kontra sa pagmaneho samtang hubog kag mga proyekto nga pang-edukasyon sa tama nga pagkonsumo sang alkohol.

Moderno nga grupo ang GDA, ginagamit nila ang social media kag mga digital platform agud ipalapnag ang ila nga adbokasiya. Nalista man nga naglunsyar sila sang isa ka app agud maka-order sang alak online, agud mapanubo ang insidente sang aksidente sa karsada.

Sa pihak sang satiriko nga imahe, daku ang nabulig sang grupo sa pagtutok sang mga isyu nga pang-komunidad kag pangabuhinan nga nakaapekto sa ila nga sektor.

Sa karon, padayon ang panawagan sang GDA para sa patas nga presyo sang alak kag responsable nga pag-inom, samtang bukas man sila sa dayalogo kag koope­rasyon sa gobyerno para sa ikaayo sang ila nga mga miyembro kag sang komunidad sang Ghanaian.